ગઝલ - જગ જ્યારે દર્દ દેતું હતું ત્યારે ક્યાં હતા - અંકિતા મારુ 'જીનલ'

 

જગ જ્યારે દર્દ દેતું હતું ત્યારે ક્યાં હતા?
દિલ એકલું જ સહેતું હતું ત્યારે ક્યાં હતા?
 
વરસાદ જોઈ સુખનો તમે આવ્યા છો અહીં,
આંખોથી પાણી વહેતું હતું ત્યારે ક્યાં હતા?

શાને કરો છો આજ અનુવાદ મૌનનો,
જખમોની વાત કહેતું હતું ત્યારે ક્યાં હતા?
 
આવ્યા છો આજ લઈને તમે ફૂલની સુવાસ,
નિ:શ્વાસ હૈયું લેતું હતું ત્યારે ક્યાં હતા?
 
આવી તમે શું કરશો હવે ફૂલ ખર્યા પછી,
કાંટાની સાથ રહેતું હતું ત્યારે ક્યાં હતા?