आउते बसंत कंत संत बन बैठे री - यमुना प्रसाद चतुर्वेदी 'प्रीतम'

चाँह चित चाँहक की चाँहि कें चतुर चारु,

चाउ ते चली कर चरचित इकैठे री

पाउते सु 'प्रीतम' के हाव दरसाउ भूरि

भाउते करौंगी मिल मन के मनेंठे री

जाउते बिलोके तौ बरन कछु औरें बन्यौ

ध्याउते दृगन मूँदि भौंहन उमैठे री

छाउते छये न छत छेद छये छाती क्यों कि
आउते बसंत कंत संत बन बैठे री 

छाँड़ि हठ हौं तौ अरी आपु ही सु जाइ ढिंग

भाँति-भाँति भावन के गुनन सों गेंठे री

'प्रीतम' पियारे प्रान पिघले न नेंकु तऊ

टेक राखि आपनी ही और अति एंठे री

ज्यौं-ज्यौं हौं मनाऊँ त्यौं-त्यौं साधत समाधि जैसी

बाँधत न हीर हिय करत अमेंठे री

मानौं मेल अंत कर इकंत में निछन्त है

आउते बसंत कंत संत बन बैठे री 

:- यमुना प्रसाद चतुर्वेदी 'प्रीतम'