ब्रजगजल - चार पैसा पाय कें बिन बात के बुकलात है - पूनम शर्मा पूर्णिमा

 

चार पैसा पाय कें बिन बात के बुकलात है

च्यों करै गिल्ला-गुजर, जम आइ कें लै जात है

 

जे भलौ आयौ जमानों, नैन नीचै है रहे

प्हैर कें फाटे घुटन्ना, ना कोई सकुचात है

 

या जनम की सिग कमाई, नीर जैसी रिस गई

दाँव सिगरे आजमाये, हाथ कछु ना आत है

 

भौत लैवे की गरज में, इत-उतै भाजे फिरे

“चार दिन की चाँदनी है फिर अँधेरी रात है”

 

पिछलगू तौ पिछलगू हैं, बात मौके पै कहौ

डेगची के नाम पै चमचा मलाई खात है

 

मेंड़ हरहारौ सजावै, खेत खरपतवार हैं

बे-छने कौ खा रह्यौ है, बे-करे कौ पात है

 

काँख में पैनी छुरी अरु मुख सों बोलें राम हैं

एक चिकनी-चूपड़ी रंग देख कें सरकात है

 

अहम् कौ टूटौ भरम , पन्ना जरौ इतिहास कौ

इकलगाँ कूँ सेर, दूजे लोमड़ा घिघियात है

 

जीति कें हू हार कौ सेला सुहायौ अनमनों

एक पट्ठा हार कें हू ,सौ गुनों मुसक्यात है

 

लोप चिट्ठि’न कौ भयौ है, लेखनी लाचार है

अपनी परिपाटी कूँ 'पूनम' संगणक ना भात है