ગઝલ - એવું નથી - દિલને સમજનારાં સફરમાં ના મળ્યાં - ડૉ. ધીરજ એસ. બલદાણિયા 'નિઃસ્વાર્થ'

 

એવું નથી - દિલને સમજનારાં સફરમાં ના મળ્યાં,
તકલીફ છે એ વાતની - અમને અમારાં ના કળ્યાં..
 
મન આમ તો સઘળીય વાતે કેળવાયેલું જ છે,
પણ, વાત આવી સ્થૈરની ત્યારે જ કીડા સળવળ્યા.. 

 આશા કરી 'તી જેમની પાસે હૂંફાળા સાથની,
એ પણ સફરમાં અધવચાળે છોડીને પાછા વળ્યાં..
 
આખા જગતથી છેતરાવાનોય બિલ્કુલ ગમ નથી,
પણ, રંજ છે એ વાતનો - અમને અમારાંએ છળ્યાં..
 
શુભકામના આપી ગયા છે સેંકડો લોકો, છતાંય,
જેને ગણ્યાં 'તાં સાવ અંગત એ પ્રસંગે ના ભળ્યાં..
 
એ ભૂલ હતી પ્રેમી-યુગલની, નાત ના જોઈ પ્રથમ,
એ બાદ સૌ સામે રડ્યાં, તોપણ, ન પથરા પીગળ્યા..
 
બાળ્યા કર્યાં સ્વજનો બધાં, ના બોલવાનું બોલીને,
તોપણ, ચિતા પર પોઢીને 'નિઃસ્વાર્થ' છેવટનું બળ્યા..