मराठी गझल - खूपच हलके वाटत आहे आता आयुष्या - गोविंद नाईक

 

खूपच हलके वाटत आहे आता आयुष्या 

(काढलास तू नक्की कुठला काटा आयुष्या?)

 

बघतो आहे नवीन घर आता माझ्यासाठी

तुला किती लागणार आहे जागा आयुष्या ? 

 

जितके ठरले होते तितके श्वास दिलेत तुला

तुझा कधी झालेला नाही तोटा आयुष्या

 

बेसावध राहील विचारांची कक्षा माझ्या

नकोस देऊ इतका सोपा मिसरा आयुष्या

 

हवा तापली आहे ही कोणाच्या श्वासांनी

चढला आहे तुझा कशाने पारा आयुष्या ?

 

तुलाच कळले नव्हते प्रश्न तुझ्यावर आलेले

जगण्याचा पेपर तर होता सोपा आयुष्या

 

क्षणाक्षणांचे सूत कातरत बसलो आहे मी

आणि तुझा झालेला आहे चरखा आयुष्या

 

जग कुठल्या इच्छेने काढत आहे चित्र तुझे ?

कशास तू ठेवलास कागद कोरा आयुष्या ?

 

तू आहेस म्हणूनच आहे शांत चिता माझी

तू गेल्यावर उडेल सगळा भडका आयुष्या