ગઝલ - ના પૂછ શોધવા તને ક્યાં ક્યાં ફરી વળ્યો - દીપક ઝાલા 'અદ્વૈત'

ના પૂછ શોધવા તને ક્યાં ક્યાં ફરી વળ્યો.
હર શહેર, હર ગલી 'ને મહોલ્લા ફરી વળ્યો.
 
જંગલ, પહાડ, નહેર, સમંદર, તળાવ, ખીણ
લાગે અશક્ય એ બધી જગ્યા ફરી વળ્યો. 

ભૂલી શકાય એમ નથી કોઈથીય એ,
છે તારી મ્હેંક ત્યાં હજી જ્યાં-જ્યાં ફરી વળ્યો.
 
નીકળ્યો'તો જ્યાંથી, ત્યાં જ પરત આવવું પડ્યું!!
કહેતો નહીં કોઈને તું દુનિયા ફરી વળ્યો.
 
અંતે કશુંય, ક્યાંય મળ્યું છે ખરું દીપક?
કે બસ અજાણતા જ અમસ્તા ફરી વળ્યો.