ગઝલ - સ્વયંને અભિનય કરાવ્યા કરું છું - સુનીલ રાચાણી 'અંતર'

 

સ્વયંને અભિનય કરાવ્યા કરું છું;
દસે આંગળી પર નચાવ્યા કરું છું.
 
સમસ્યા વિના સાવ લાગે છે સૂનું;
સમસ્યાને મુદ્દત અપાવ્યા કરું છું.

ગઝલ હો કે જીવન, કરું ભૂલ સરખી;
લઘુને ગુરુમાં ખપાવ્યા કરું છું.
 
કદી લાગશે કામ, એવું વિચારી-
ઘણી આદતોને નભાવ્યા કરું છું.
 
ફિકર ના કરે માવતર, એટલે તો;
ઠરીઠામ ખુદને બતાવ્યા કરું છું.
 
ઉઘાડું ઘણી વાર 'અંતર'નાં દ્વારો;
ઘણી વાર સાંકળ લગાવ્યા કરું છું.